تعالوا نتعلم اوراكيل

[Hossam Abd El-shahid]

أستاذنا

أنا رجعت لك معلهش كنت مشغول شوية

بص يا باشا

أنا بشتغل علي البرودكشان بتعلم فيه ينفع أعمل حاجة غير SELECT

أنا خايف طبعا أطير حاجة

[babbypirate]

عزيزي مصطفى 2010
الاوراكل هو نظام قواعد بيانات لو اشتغلت على برنامج ميكروزفت اكسس هو قريب منه بس الاوراكل بيتعامل مع قواعد ضخمه


الدرس الجديد

بسم الله الرحمن الرحيم
درس جديد و محتاج تفتيح دماغ يا شباب
عرفنا في الدرس السابق استخدام كلمة where عشان نحصر البيانات بشروط و عرفنا بعض من الشروط اللي هي between و and و or لسه في شروط كتير
بما انك مبرمج لازم تكون عارف الحاجات دي
طيب نراجع ع السريع على الدرس اللي فات كله في كود واحد
عايز اسماء الموظفين اللي عندي بس يكون راتبهم بين 3000 و 5000
او يكونوا ساكنين في القاهرة ( طبعا استحالة يجيلك كود زي ده لان ده خيالي )
الحل :-
SQL>select emp_name
2 from employs
3 where emp_sal between 3000 and 5000 or emp_add = ‘ cairo ‘
4 ;
وعرفنا ازاي نبحث مع الشرطه عن شخص هربان من السجن بمعرفه احد حروف اسمه
طيب لو عندي مثلا مليون اسم و انا لسه طازه في الشغل طبعا مش عارف ولا اسم من الاسماء دي و طبعا ممكن اكتب الاسم كده rami او اكتبه كده ramy طيب انا محتار و مش عارف مكان الحرف فين اعمل ايه ؟
المدير جه و قالك عايز كل الموظفين اللي في اسمهم حرف r و سابك و مشي
مش عارف حرف r هو الحرف الاول ولا التاني ولا التالت ولا ولا ولا
الحل اهو
SQL> select emp_name
From employee
Where emp_name like ‘%r%’
;
الاوراكل هيدور و هيدعبس على اي اسم فيه حرف r وهيجيبه من افاه

ملحوظه صغيره
الصيغة العامة لكتابة التاريخ “ DD,MON,YY”
DD يعني اليوم وطبعا عارفين ان الايام اخرها رقمين مثال ذلك 31
MON دي 3 حروف مش اكتر مثال ذلك OCT
YY دي السنة يعني 09 يبقى 2009 طيب 99 يعني 1999 طيب 84 يعني 1984
كده اشطه
ماشي
طيب المدير قالك هاتلي الموظفين اللي في الادارات اللي ارقامها 10 و 40 و 84
يعني حددلك الارقام
الحل
SQL> select emp_name
From employee
Where dep in ( 10,40,84) ;
وبالشفا ان شاء الله
ليه انا اخترت امر in ؟ سؤال بيطرح نفسه ؟!! اقولك لان عندي الحاجات متحددة يعني انا عارف هجيب العدة منين

نيجي بقى لحدة حلوة اوي is null يعني ايه الكلمة دي ؟ يعني الحقل فارغ
طيب ازاي الحقل فارغ ؟؟ يعني مش فيه بيانات
مثال ذلك :-
عندي موظف شغال ميه ميه طبعا بياخد الراتب بتاعه و هديله حاجه اسمها العمولة
و في موظف بيقولك انا عايز اخد الراتب بس و مش عايز العمولة
المدير جه و قال انا عايز اشوف الناس اللي مش عايزه تاخد العمولة
يبقى العمولة بتاعتهم صفر وطبعا صفر غلط لانه مالوش عمولة و الصفر ده يعتبر رقم في البرمجه
يبقى الحل اننا ندور على الخانه الفاضية تيجي ازاي ؟؟
SQL> select emp_name ,comm.
From employee
Where comm is null ;
لاحظ اني استخدمت is و ما استخدمتش = لان = مع null غلط نركز يا شباب
يبقى مع NULL نستخدم IS عشان تبقى IS NULL
متفقين على كده

طيب لو حبيت انفي يعني اعكس جملة الشرط بتاعتي
المدير قالي هاتلي اسماء الموظفين اللي بياخدوا كومشن على الراتب بتاعهم
طيب هو قالي الكومشن بتاعهم قد ايه ؟؟ لا
طب اعمل ايه ؟ اعمل ايه ؟ المره دي لازم تديلة 100 جنيه عشان يمشيلك امورك و بما اننا في نص الشهر و العملية على الحديدة يبقى ما قدمناش غير حل واحد
ان احنا نجيب الخانات الفاضيه و نعكسها ازاي ؟؟
الحل
SQL> select emp_name , emp_comm.
From employee
Where emp_comm is not null ;
يعني قلتله هاتلي اسماء الموظفين و الكومشن بتاعهم لما يكون الكومشن بتاعهم قيمة مش فاضيه
يبقى كده عكسنا الخانات الفاضيه يعني بدل ما هيجيب الخانات الفاضيه هيجيب الخانه اللي فيها ارقام
طيب نقدر نستخدم not مع كل حاجه ؟ اقولك على حسب
يعني اقدر استخدمها مع between
SQL> select emp_name , emp_sal
From employee
Where emp_sal not between 1000 and 2000 ;
طيب ايه الحالات اللي نقدر نستخدمها مع Not ??
خد عندك between ونكتبها كده not between and
Not in ( , )
Not like ( ‘ % ‘)
Is not null
والى لقاء اخر ان شاء الله تعالى

[amrosh101]

كل الي اقدر اقولو ربنا يكرمك ويحفظك ويحيمك وواللة انتا بجد استاذ مشعشان بتشرح لينا بس وكمان خايف علي ناس متعرفهمش


وسوالي احنا ممكن نشتغل بالديفولبر بس من غير الداتا بيز

ومرة تانية الف شكر

[mostafe2010]

متشكر جدا على الرد السريع والا ستجابة بس انا بصراحة حبيت الاوراكل من كلامكم وعايز اتعمق فيه انا من اسيوط هل فيه دورة اوراكل في اسيوط اقدر اخدها

[ahmed _m]

ربنا يحفظك ويحميك ويسدد خطاك
وشكرا على المعلومة القيمه

[م/طارق القرم]

 

أخويا وحبيبي رامي

 

حضرتك بتتكلم جد ؟؟ 11 ازاي

 

ناقص 3 زائد 4 في 5 زائد 3

 

ال (في) أعلى أولوية في البوليان ألجبرا من ال (الزائد)

 

عشان كدة حاينفذ الضرب الأول

 

يبقى ناقص 3 + 20 زائد 3

 

يبقى 20

 

الا لو أوريكل بتلعب بديلها

 

أو حضرتك مستعجل تسافر

 

بجد رد عليا ف دي عشان حقيقي جايز أنا غلطان

 

بعدين عندك نملة زيادة غير اللي جنب التوقيع دي ؟؟؟؟

 

 

بجد عسولة أوي

 

تم تعديل 26 فبراير 2009 بواسطة م/طارق القرم

[babbypirate]

عزيزي المهندس طارق
لو حضرتك ركزت شوية هتلاقي ان الاول هي عملية الطرح
3+4*(4-9)+ 4-1
رقم 1 - رقم 4 هيطلع سالب 3
و بعد كده هنطرح 9 من 4 هيطلع 5 و هنجمع عليه سالب 3 يبقى الناتج موجب 2 و بعد كده هنضرب موجب 2 في 4 هيطلع 8 و هنجمع عليه 3 يبقى 11 ومش هاجي في اليوم ده يا باشا ولا تزعل

عزيزي ahmed_m شكرا على ردك و يارب تكون استفدت معايا و تابع ان شاء الله هنزل الدرس الجديد قريب
عزيزي amrosh101 شكرا للمتابعه و اعذرني اني ما رديتش على حضرتك
ممكن نشتغل من غير الداتا بيز بس هش هيكون عندك اي قواعد بيانات يعني مالوش لازمه
عزيزي Hossam Abd El-shahid شكرا على متابعتك معايا و ان شاء الله تستفاد بالنسبه لاستفسارك بص طول ما انت خايف مش هتتعلم

وبشكر كل الناس اللي بتشجعني اني اكمل الحلقه الدراسيه دي و ان شاء الله اكون عند حسن ظنكم و ان شاء الله الكل يستفاد بس ياريت تدعولي بضمير و اهم حاجه الضمير مش تدعولي دعوه من اللي هي بربع جنيه و السلام

تقبلوا تحياتي و انتظروا الدرس الجديد و هنتكلم عن الدوال

تحياتي لكم

[Ahmed_oracle]

الأخ / babbypirate

شكرا لك على الجهد المتميز ... واسلوبك المميز فى الشرح

لقد كتبت المعادلة الحسابية وكان الناتج كالتالي

SQL> select 1-4+(9-4)*4+3 value from dual; VALUE
---------
      20

[babbypirate]

أنا اسف يا شباب على الخطأ اللي حصل تقريبا الاوراكل ما بيعرفش السالب و لو جربناها على الاوراكل هيدينا الناتج 20
كده في ناس شغاله و انا اسف على الغلط
تحياتي لكم و شكرا لك يا احمد _ اوراكل

انتظروني في الدرس الجديد

[babbypirate]

محدش عايز يشتغل ولا ايه ؟؟
على العموم الدرس خلص و مستني التفاعل

تحياتي لكم

[جلال شواقفه]

مرحبا

درسك جميل ومواضيع مميزه
استمر لاجل الاعضاء الجدد وشكرا لك

[babbypirate]

ان شاء الله هستمر بس اعذروني عشان ظروف العمل


تقبلوا تحياتي

[babbypirate]

ورجعنالكم من جديد و ان شاء الله هنواصل مسيرة تعلم اوراكل
اسف على الغيبه الطويله لظروف خارجه عن ارادتي
و ان شاء الله هحاول على اقد ما اقدر اني اعمل الدروس و ارفعها لكم عشان الكل يستفيد
ان شاء الله هعمل مراجعه على الدروس اللي فاتت ع الماشي كده عشان الناس تفتكر و نبدا علطول في الدروس الجديدة

تقبلوا تحياتي و مروري