لما تروح تاخد أي دورة ......

[ahmed_orcl]

لما تروح تاخد أي دورة كمبيوتر في أي مكان لازم تكون ناصح و أوعه حد يضحك عليك في أي مكان بعد كده تقولي إزاي أقولك بص يا سيدي
لازم لما تروح تحجز الكورس في أي شركة كمبيوتر أياً كان نوع هذا الكورس لابد تعرف أنت هتاخد إيه في الكورس ده متخشش الكورس على عماك و بعد كده المحاضر يديك إلي هوه عايزه حسب مزاجه يعني تسأل عن الـ outline أو العناوين التي سوف تأخذها في الكورس.
لازم كمان تسأل عن المحاضر و مستواه العلمي أنت دافع فلوس يعني المفروض يخش يديك الكورس حد متمكن من الماده و ميكنش راجل أكاديمي بس يعني راجل حافظ الكلمتين من الكتاب و بيخش يقولهملك لازم يكون بالعربي كده صنيعي يعني من الآخر لازم يكون الراجل إلي هيديك الكورس بيعرف يشرح بجد و كمان متمكن من المادة العلمية و كمان يكون اشتغل بإيده علشان يعرف ينقلك أسرار الصنعة لأن أنت لما تروح تشتغل أنت طبعا هتقدم شهادات الدنيا كمية شهادات في السيرة الذاتية تلاقي صاحب الشغل يقولك بص يا ابني قالوا الجمل طلع النخلة أدي الجمل و أدي النخلة و الله الكمبيوتر موجود وورينا الشغل إحنا هنشتغل مع بعض أسبوع و بعدها هنحدد كل حاجة وجدك متمكن هتحط كل شروطك و صدقني هتاخد المرتب الذي تريده أما بأ لو وجدك من بتوع الشهادات و سعتها هيقول لك كلمه ظريفة إحنا كلنا عارفنها إتفضل روح و سي نمرة تليفونك و خلي بالك في شركات الكمبيوتر بيحاول يضخملك حجم الشهادة جدا و يحسسك إنك واخد شهادة لها وزن صدقني في النهاية كله حبر على ورق و في الآخر يبقى السؤال إنت بتعرف تشتغل فعلا و لا لأ .
على فكرة مفيش مانع إنك تطلب تقابل المحاضر و تتكلم معاه عن الكورس و تستفسر منه على كل سيئ و هيبان إن كان محاضر قوي و لا مشـــــــــــــ تمام.
إسأل طبعا عن الماتريال material الخاص بالدورة أي الكتاب الخاص بالكورس و في حركه وحشة أوي بيعملوها في الشركات يديك كتاب 3000 صفحة على اسطوانة و يقولك ده المنهج طبع أول ما سعتك تفتح الكتاب يجيلك سكته قلبية و في الآخر تلاقي المحاضر مديك قشور و الكتاب ليس له أي علاقة بالمنهج إسأل يا باشا عن المنهج الذي ستأخذه في الكورس علشان تعرف تحاسب المحاضر و تقول له إحنا مخدناش دي و خدنا دى و المعلومه دي ناقصة و على فكرة ممكن تخش على النت و تعرف معلومات عامة عن الكورس ده علشان محدش يستغفلك و يديك أي حاجة .
لو سمحت أرجوك لما تلاقي أي حاجه غلط في الكورس لا تسكت على حقك و تقول أنا مكسوف يعني أجهزه تعبانه مثلا المحاضر بيجي بعد المحاضرة بنصف ساعة علشان يضيع أكبر وقت ممكن لأنه معندوش مادة علمية يديها فيبدأ يعمل إيه ييجي متاخر و كمان فترة البريك أو الاستراحة تلاقيها طويله جدا خلي بالك كله من فلوسك و يعد بأ طول المحاضرة يحكيلك قصص و حواديت عن حياته و يقولك أنا مرة كنت و مرة كان كل ده كلام فارغ صدقني بيحاول يضيع الوقت بأي طريقة لأنه في الشركة بيحسبوه بالساعة فتلاقي الثلاث ساعات بتوع الكورس فعلا بجد صفوا على ساعة و نصف طبعا دي سرقة علني.
أرجوك خليك ناصح تلاقي الشهادات مكتوب عليها ميكروسوفت و أنت بتاخد كورس أدوبي فوتوشوب مال ميكروسوفت بالفوتوشوب حاجة كده بصراحة تأرف يا باشا لازم سعتك تكون مثقف و تسأل عن كل حاجة علشان حتى الناس تحترمك أنت تعرف في شركات الكمبيوتر بتاعة التدريب لما بيلاقوا حد مثقف كده بيحترموه جدا و بيخافوا منه و بيعملولو ألف حساب علشان هوه فاهم و مش هيعرفوا يضحكوا عليه.
يا أخي الغريب إن الناس في شركات التدريب الخاصة بالكمبيوتر تلاقي الطالب دخل – دفع – طلع – أبيض و لا تجده يعترض على أي شيئ و يقولك مكسوف و منظر الشركه يخضه خلي بالك العمليه عادي خالص دي مش ناس جيه من أمريكا صدقني العملية أبسط مما تتخيل فلو سمحت متتخضش و طالب بحقك أنت دافع فلوس يعني أنت ألي بتصرف على الناس دي – تلاقي المجموعة كلها قاعده مش فهمين حاجة خالص و كله مكسوف يقول أنا مش فاهم صدقني عمرنا ما هنطور و لا نتقدم خطوة للأمام طالما فينا الخصال دي على العموم كلنا نسعى للتغيير و ربنا يجعل الأيام القدادمه كلها حرية و نور.
لو معجبكشي حاجة في الشركة من فضلك إسأل على المدير و أكتب شكوتك في ورقة و أعطها له طبعا هتلاقي شويه تعتيم من الموظفين على نمرة التليفون الخاصة بالمدير و كمان المواعيد التي يأتي فيها خليك مصر و أوعه تسيب حقك بعد كده أرجوك إحنا عايزيين البلد دي تنضف أرجوك لا تتهاون في أي حق ليك عند أي حد.
على فكرة المفروض أن بعد كل خمس محاضرات بيدوك تقييم للمحاضر evaluation و المفروض سعتك تعطي درجات للمحاضر درجة على اهتمامة و درجة على مواعيده و درجة على قوته في الشرح طبعا سعتك أكتب رأيك في كل حاجة بصراحة و لا تكتب إسمك على الورقه علشان المحاضر بيشوف هذه الورقة بعد ذلك و طبعا لو أنت كاتب كلمتين مش ولابد هيصتأصدك خليك ناصح.
على فكرة يا جماعة أنا محاضر و السؤال أنا كتبت الورق ده ليه أنت عارف ليه علشان أوعيك و علشان محدش يضحك عليك بعد كده و علشان نكون أحسن ناس في الدنيا و علشان الدين النصيحة و علشان نتقدم و يكون فيه تطور و علشان حاجات كتير أوي يا رب تكون الرساله وصلتك.

Thanks
Best Regards

Ahmed Mohamed Fathy Radwan
Oracle Technical Consultant
Oracle Developer

Amricana Group
Emak International Academy "AN ORACLE Academy"

Egypt
+20104207937
[email protected]

أدعو كل الناس التي تعمل في وظائف مختلفة أن تقوم بعمل مشابه لتوعية الشعب المصري و العربي و الإسلامي خلاص يا جماعة أنا شخصيا قررت أن أعبش بني أدم و عمري ما هكون مغفل بعد كده أبدا و عمري ما هسكت على حقي مهما كان الثمن.
أعتذر للتطويل و أرجو نشر الكلام ده حتى تعم الفائدة.

[skybird1961]

تحية طيبة و معاك في كل كلمة قلتها

و احب اضيف ليس كل من حصل على الدورات المعتمدة هو مطور اوراكل الكثير حصلوا على الدورات و سامحونى و لا يعرفوا يعملوا اي تقارير غير ربما حاجات بسيطة ( البعض و ليس الكل)

[عمرو النادي]

كلام رائع واحيك بشده

[Eng_AL_kamel]

بارك الله فيك
يا استاذ ahmed_orcl
كلام في الصميـم 100% .....

[dba5]

شكرا على النصايح المفيدة