إنتقال للمحتوى

  • تسجيل الدخول عبر الفيس بوك تسجيل الدخول عبر تويتر Log In with LinkedIn Log In with Google      تسجيل دخول    
  • إنشاء حساب

صورة
- - - - -

تعالوا نتعلم اوراكيل


87 رد (ردود) على هذا الموضوع

#31 hanyfarrag

hanyfarrag

    عضو

  • الأعضــاء
  • 5 مشاركة

تاريخ المشاركة 26 January 2009 - 03:14 PM

موضوع ممتاز تسلم إيدك يا زعيم
يا ريت تستمر

#32 babbypirate

babbypirate

    مشترك

  • الأعضــاء
  • 50 مشاركة

تاريخ المشاركة 26 January 2009 - 08:34 PM

بسم الله الرحمن الرحيم

ازيكم يا شباب

نخش في الدرس علطول و ياريت التليفونات صامت عشان من عايزين ازعاج

توكلنا على الله

ازاي نكتب كود و نتاكد انه صح ؟؟؟؟

اولا :- ممنوع استخدام الكلمات المحجوزة للباشا اوراكل زي ( select , update , insert , delete ,.... الخ الخ )
يعني ايه ممنوع استخدام الكلمات المحجوزة زي ؟؟ يعني لما تيجي تسمي جدول ما تسميش الجدول باسم من الاسماء دي
مثال على ذلك :-
SQL> create table INSERT ;
طبعا هيطلعلك ايرور علطول يقولك ما تلعبش في عداد عمرك الكلمه دي بتاعتي و مش من حقك انك تستخدمها استخدام شخصي
يبقى نكتب الكود كده
SQL> create table students ;
كده يقولك انت صاحبي و حبيبي و كفاأه

ثانيا :- المحروس اوراكيل بيقولك اكتب الكود بأي حاله سواء كانت الحروف كبيرة او صغيرة ما يهمنيش ( انا اللي يهمني الشغل :))
يعني لما نيجي نكتب الكود ده لو كتبناه بالشكل ده
SQL>select * from students ;
هو هواه لو كتبناه بالشكل ده
SQL>SELECT * FROM students
لاحظ كده يا بوب اني كتبت اوامر SQL مره بالحروف الكبيرة و مره بالحروف الصغيرة بس لما قلتله يجيبها من الجدول اللي اسمه students كتبته بحروف صغيره في الحالتين , طب ليه يعني اشمعنى هو اللي كتبته بالحروف الصغيره ( هي الكوسه حتى في الاوراكل )
اقولك لا مفيش كوسه ولا حاجه بس اوامر اوراكل مش بتهتم بحالة الحرف لانها موجوده عندها عشان كده انت ما بتقدرش تستخدمها في تسميه الجداول بتاعتك
اما اسم الجدول بتاعك ( يا عيني ابن البطه السودة ) ده حضرتك اللي عملته يعني تخلي بالك و انت بتكتب الجدول هل هو حروفه كلها صغيرة ولا كلها كبيرة ولا اول حرف بس اللي كبير و الباقي صغير
خلوا بالكم ياما ناس قعدت تدور على الجدول و تيجي تقول مش لاقي جداول خالص و يتضح انه كاتب اسم الجدول غلط ( غلط يعني حالة الاحرف ) الحته دي مهمه ركزوا عليها

ثالثا :-
لما نيجي نكتب كود طويل لازم نفصل بين الحقول مش تبقى كلها مهلبيه لا لازم نخلي شغلنا نضيف يبقى نحط بين الحقول الفاصلة ( , ) من غير الاقواس طبعا :unsure:
مثال ذلك

SQL> select ename as name , sal salary , job " smployee job " from emp ;
لاحظ اني حطيت الفاصلة بين كل حقل و التاني

رابعا :-
اوراكل بيقول " يا جماعه لو عايزين تكتبوا الكود كله مره واحده ما عنديش مشكله ( يعني على سطر واحد ) و لو عايزين تكتبوا الكود على كذا سطر بردو مفيش مشكله بس لما تخلصوا شخبطه و لعب بالاكواد يا ريت تحطولي الاشارة دي ( ; ) الفاصلة المنقوطه بدون الاقواس طبعا عشان ابدا اشوف شغلي و اشوف الشخبطه اللي عملتوها " .
ملحوظة :-
لازم ناخد كلام الراجل ده جد لانه حمقي شويتين

رابعا :-
سامع واحد بيقولي خامسا طبعا هرد عليه و اقوله و انت مالك انا اللي بشرح :blink:
عشان نزوق الشغل بتاعنا و نخلي منظره حلو و ابن ناس و اللي يشوفه يقدر يفهم نخلي كل كود على سطر
مثال ذلك :-
SQL> select *
2 from Table
3 where consditions
4 order by column ;

او ممكن نخلي الفاصلة المنقوطه على سطر لوحدها بس ياعيني هتبقى لوحدها كده غلبانه خليها في اخر الكلام و خلاص عشان ما تبقاش لوحدها


اوراكل بعتلي مسج بيقولي عشان خاطرك انا ممكن ابدا انفذ الشخبطه اللي بتعملوها في الاكواد لو كتبتلي الحاجات دي

;
او
run
او
/
يعني من الاخر اوراكل عملنا عرض خاص ( و لفتره محدودة ) اكتبله الاكواد اللي سيادتك عايزها و في الاخر لما تحب تخليه يشتغل حطله الفاصلة المنقوطه او اكتبله كلمة run او /


لحد دلوقتي يا شباب انا مش شايف غير واحد بس اللي مشارك معايا اللي هو الاخ BeCkHaM .11
يا شباب انتوا لو شايفين ان الموضوع ده مالوش اي لازمه قولولي عشان ما اضيعش وقتكم و وقتي
انا مش عايز ردود بقد ما انا عايز مشاركات انا ممكن اشوف ان الحته دي سهله و اكروت فيها في حين ان في ناس شايفه ان الجزئيه دي صعبه و عايزه تتبسط

الى الان وصلنا بمعرفتنا العميه في اوراكل الى
1- تعملنا متطلبات كتابة الكود في sql ( درس النهارده لسه طازة )
2- عرفنا اهم امر في sql و هو ====> select و عرفنا ازاي نستخدمه
3- عرفنا اوامر التعامل مع البيانات ====> insert , update , delete
4- بدانا في التعامل مع الجداول باستخدام امر create و عرفنا ازاي نعمل جدول جديد و ازاي نعمل جدول جديد بخصائص جدول قديم و ازاي نحط قيمة افتراضيه للبيانات اللي جوه الجدول

النهارده و بعد ما خلصنا شروط كتابة الكود نخش على انشاء جدول جديد بس هقولكم على خاصية جديدة ( عشان تعرف الناس انك واد ادرجي )

عملنا الجدول الجديد اللي هو عملناه المره اللي فاتت
SQL>create table students
2 (
3 St_no number (10) unique ,
4 st_name varcher (40) not unll ,
5 st_add varchar (50 )
6 St_national varchar (15)
7 Default ‘ Egypt’
8 st_sex varchar(1)
9 check ( st_sex ( 'm ' , ' f ' ))
10 (;

هو نفسه الجدول بتاع امبارح بس دخلنا عليه خاصية انه يشيك على الحاجه اللي داخله
يعني عملنا عمود اسمه نوع الطالب هل هو " دكر ولا انتايه "
طبعا احنا حطينا حرفين بس m = دكر و f = انتايه
عشان محدش من المستخدمين يتذاكا و يحطلي حرف z و يقول اصله من النوع التالت :D
هم نوعين بس هتحطلي انت الثالث الاوراكل هيقولك غلط غلط غلط ما عنديش النوع التالت ده ليه لاني قلتله اللي هييجي يسجل يا دكر يا نتايه

كفايه كده و نخش ع اللي بعده
طبعا قواعد البيانات بتتعامل مع بعضها عن طريق العلاقات ( في الحلال محدش يفهمها غلط )
ازاي بيبقى في حاجه اسمها مفتاح اساسي و في حاجه اسمها مفتاح ثانوي
العمليه دي سهله اوي لو بتستخدم الاكسس كل اللي عليك هتيجي على الحقل اللي عايزه يكون مفتاح اساس بشرط ان البيانات اللي فيه ما تتكررش و تديله كليك يمين بالموس ( بس تكون متوضي ) و تختار مفتاح اساس او ترجمتها بالانجليزي primary key
و انشاء العلاقات دي سهله و ده موضوع سهل بس مش هشرحه دلوقتي هنتعلم فيه ازاي نعمل علاقه بين الجداول ( و نوفق بينهم و يا بخت من وفق مفتاحين في الحلال :D)
نرجع لموضوعنا
ازاي نعمل مفتاح اساسي بلغة sql
زي ما انا قلت ان العمليه دي سهله في الاكسس بردو سهله هنا كل اللي عليك هتديله 5 جنيه من تحت الترابيزه و هيمشيلك الامور
مثال ذلك :-
SQL> create table students
2 (
3 st_no number (20)
4 primary key ,
5 st_name varchar ( 30)
6);
عملنا ايه احنا هنا ؟؟
عملنا جدول جديد فيه رقم الطالب و اسم الطالب و بما ان رقم الطالب مش هيتكرر قلتله ده يا باشا هو مفتاح الاساس
طيب احنا عملنا دلوقتي مفتاح اساسي في الجدول
انا سامع واحد بيقولي هو ينفع يبقى في جدول واحد مفتاح اساسي و مفتاح ثانوي ؟؟ اقوله اه ينقع
ينفع يكون فيه مفتاح اساسي في الجدول و مليون مفتاح ثانوي عادي جدا بس اللي مش عادي انه يبقى عندك اكتر من مفتاح اساسي في جدول واحد

طيب ازاي نعمل مفتاح اساسي و مفتاح ثانوي يا معلم ؟؟

اولا هنعمل جدولين واحد للاقسام و التاني للطلاب
جدول الاقسام
SQL> create table section(
2 sec_no number ( 20 )
3 primary key
4 sec_name varchar (30)
5)

ونعمل جدول تاني للطلاب
SQL> create table students
2(
3st_no number (30)
4 primary key
5 st_name varchar (30)
6 sec_no number (20) references
7 section (sec_no)
8 ) ;

وكده يا شباب يبقى عملنا جدولين الاول للطلاب و التاني للاقسام و وربطنا جدول الطلاب بجدول الاقسام من خلال تعريفنا للمفتاح الاساسي اللي في جدول الاقسام في جدول الطلاب على اساس انه مفتاح ثانوي
وكده بقى نكون خلصنا الحصه بتاعة النهاردة طويلة و دسمه وكل يوم من ده و ان شاء الله الاقي مشاركات و حماس ( مش حماس بتاعت فلسطين :D)
الدرس الجاي هنكمل باقي اوامر لغة التعامل مع الجداول و بكده يبقى رمينا اول عمود خرسانه في القاعده اللي بنبنيها للاوراكل عندنا

شباب انا والله بتعب جامد عشان اشرح الشرح المبسط ده ياريت محدش ياخد الشرح ده و ينقله الى منتدى تاني و يحطه باسمه
انا مش بطلب منكم فلوس مقابل الشرح ده انا كل اللي بطلبه حاجتين بس
1- تدعولي بالخير و لوالدتي
2- اني الاقي مشاركات جد لاني حاسس ان مفيش غير 1 بس اللي مشارك معايا

تقبلوا تحياتي و الى لقاء اخر ان شاء الله تعالى

#33 angel of dreams

angel of dreams

    عضو

  • الأعضــاء
  • 6 مشاركة

تاريخ المشاركة 26 January 2009 - 09:08 PM

دكتور على فكره حضرتك استاذ ده مش مجال مناقشه بس حضرتك قولت علشان نتعلم بس على العموما حضرتك كاتب4 st_name varcher (40) not unll كلمه null حضرتك كاتبها unllوانا اسفه لواتفهمت غلط مع الشكرعلى المجهود

#34 angel of dreams

angel of dreams

    عضو

  • الأعضــاء
  • 6 مشاركة

تاريخ المشاركة 26 January 2009 - 10:04 PM

دكتور انا كمان تلميذه من تلميذه حضرتك وانا مع حضرتك فى الدرس وشكرا للشرحوالنهارده مفيش واجب وده شى جميل :)

#35 BeCkHaM.11

BeCkHaM.11

    عضو

  • الأعضــاء
  • 16 مشاركة

تاريخ المشاركة 27 January 2009 - 06:45 AM

كالعادة ... الشكر والتقدير لشرحك الجميل دة.. والتألق والابداع والحاجات الحلوة اللي بتزيد منك يوم عن يوم...
بس بصراااحة الدرس دة خلاني ادخل كل حاجة في بعضها...
بالراااحة بقا اقولك على الحاجات اللي انا ما فهمتهش.. مع اني نفسي اعمل كوبي وبيست للدرس كله على اني ما فهمتووش :)
=== === === === === === ===
اولا انا ما فهمتش اي حاجة في الكود دة
SQL> select ename as name , sal salary , job " smployee job " from emp ;
هوا ايه الل حصل هنا بالظبط.؟؟؟؟
=== === === === === === ===
تاني حاجة ممكن تعيد الحتة دي علشان انا ما فهمتهااش كويس..
جدول الاقسام
SQL> create table section(
2 sec_no number ( 20 )
3 primary key
4 sec_name varchar (30)
5)

ونعمل جدول تاني للطلاب
SQL> create table students
2(
3st_no number (30)
4 primary key
5 st_name varchar (30)
6 sec_no number (20) references
7 section (sec_no)
8 ) ;
بجد انا مش عارف ايه الي حصل هنا... يا ريت تشرح الكوود زي ما كنت بتشرحه زمااان بالتفصيل الممل الخنيييق :unsure:.. ( وما تقوليش عايزنا نرجع زي زمان قول الزمان ارجع يا زماان ) يلا بقا اتجدعن معايا علشااان ادفعلك الحاجات اللي على النوتة.. طبعا اوعوا تسدقوا اني هدفعله حاجة انا بقالي 3 درووس بقول الكلام دة لحد ما اخلصص شرح وبعديها هقوووم يا فكييييييييييك... احلاها نحشة :blink:
شكرا اوي لحضرتك ومنتظر منك الرد :D

تم التعديل بواسطة BeCkHaM.11, 27 January 2009 - 06:47 AM.


#36 babbypirate

babbypirate

    مشترك

  • الأعضــاء
  • 50 مشاركة

تاريخ المشاركة 27 January 2009 - 08:55 AM

شكرا يا جماعه على المتابعه

اولا الكود ده
SQL> select ename as name , sal salary , job " smployee job " from emp ;
هو كود عادي و انا حطيته على سبيل المثال يعني مش للشرح انا حطيته عشان اعرفك ان بين كل حقل و حقل لازم نحط فاصلة

والجدول ده يا باشا
SQL> create table section(
2 sec_no number ( 20 )
3 primary key
4 sec_name varchar (30)
5)

ده انا عملت جدول للاقسام عملت فيه ايه ؟؟
قلتله اعملي جدول للاقسام وعملت عمود لرقم الاقسام و خليته يبقى هو مفتاح اساسي
primary key يعني بقوله الــsec_no ده هو هيبقى مفتاح اساسي للجدول
وعملنا جدول الطلاب
SQL> create table students
2(
3st_no number (30)
4 primary key
5 st_name varchar (30)
6 sec_no number (20) references
7 section (sec_no)
8 ) ;

لاحظ كده ان لغاية السطر الخامس هو نفس الجدول السابق بس الجدول ده للطلاب نيجي بقى بعد كده للسطر السادس
عملت ايه ؟؟؟ حطيت sec_no number ده اللي هو موجود في جدول الاقسام و لاحظ اني حطيت كلمة references <====يعني ايه الكلمه دي ؟؟ يعني مرجع او راجع الى
طيب راجع الى ايه بقى ؟؟ راجع الى الجدول section وده اللي كتبته في السطر رقم 7 و sec_no هو مفتاح الاساسي بتاعنا

لو في حاجه مش واضحه في كلامي قولي

مستني الردود و التعليقات

تحياتي لكم

#37 BeCkHaM.11

BeCkHaM.11

    عضو

  • الأعضــاء
  • 16 مشاركة

تاريخ المشاركة 27 January 2009 - 09:02 AM

والله انا قاااعد سهراان مستنيييك.. بجد شكرا اوي انا فهمت تماااام كدة....
تمااااااااااااااااام بجد شكرا اوي ليك.. واظن اني هقدر اتواصل اكتر وافهم اكتتر لما ابدأ اشتغل عملي على الكلام دة...
ف يا ريت تحط كدا 100 سؤااال واااجب.. علشااان الواحد يجرب ويشوووف :)
وشكرا اوي تاني لحضرتك

#38 ahmedibrahem

ahmedibrahem

    عضو

  • الأعضــاء
  • 7 مشاركة

تاريخ المشاركة 27 January 2009 - 09:58 AM

ربنا يجزيك خير
بصراحة شرحك جميل
بالتوفيق ان شاء الله

#39 abu_sami

abu_sami

    مشترك

  • الأعضــاء
  • 82 مشاركة

تاريخ المشاركة 27 January 2009 - 12:59 PM

بصراحة شرحك رهيب
ومستفيدين من دروسك

الله يجز يك الخير
ابو سامي

أمتي :هل لك بين الأمم ------- منبر للسيف أو للقلم

#40 elbanna2008

elbanna2008

    مشترك

  • الأعضــاء
  • 68 مشاركة
  • البـلـد: Country Flag

تاريخ المشاركة 27 January 2009 - 01:28 PM

السلام عليكم
ملحوظه بسيطه
اولا جزاك الله خيرا الاستاذ اللى كاتب الموضوع(مش عارف اقرا اسمه) :)
فى حاجه بسيطه بس تقريبا مش صح اوى وهيا انى اقدر اكتب اسم الجدول زى ما انا عايز حروفه كبيره او صغيره وا حرف كبير وحرف صغير والاوراكل مش هيعترض
وجزاك الله خيرا
وربنا يجزيك خير على مجهودك الرائع

#41 babbypirate

babbypirate

    مشترك

  • الأعضــاء
  • 50 مشاركة

تاريخ المشاركة 27 January 2009 - 08:17 PM

السلام عليكم يا شباب

شكرا لكل الناس المتابعه معايا و الاخ البنا2008 اللي مش عارف يقرا اسمي شكرا يا باشا على المعلومه بتاعتك هي صحيحه بس مش في كل الاحوال يعني انا لما جيت اجرب اني اعمل select على اسم في الجدول وكنت كاتبه بحروف كلها صغيره وكتبته بحرو ف كبيرة طلع عندي ايرور و لما جيت اعمل select عليه و كتبت الحروف صغيره قالي موجود و جابه
عشان كده انا حابب الشغل كله يبقى نظيف يبقى نركز في اسماء الجداول و اسماء الحقول و البيانات الداخله عشان ما نتعرضش لمشاكل وهو ده قصدي

على فكره انا مش زعلان انك بتعدل على كلامي لا والله بالعكس انا ما عنديش مانع نتناقش و نشوف وجهات النظر و اختلاف الآراء لا يفسد القضيه احنا جايين هنا عشان نتعلم و انا مهما كان بشر و البشر مش معصوم من الغلط .

على العموم تابع معانا و ان شاء الله هتستفيد

نبدا بقى الدرس يا شباب
بس قبل ما ابدا الدرس انا عايز سندوتشين حواوشي و ازازة بيبسي مشبرة



مش هبدا الا لما آكل






مستني الدلفري :)

#42 BeCkHaM.11

BeCkHaM.11

    عضو

  • الأعضــاء
  • 16 مشاركة

تاريخ المشاركة 27 January 2009 - 09:49 PM

hgsلام عليكم.. ازيك يا باش مهندس :)
انت ما ردتش علياا في موضووع الاسئله الي انا طلبتها منك....
على العموووم انا في انتظاار الدرس الجديد ان شاء الله :unsure:
وبالنسبة للاكل خلص انت بس الشرح وانا هعشيييك في فرايدايز :blink: :D طبعا مفيش احلى من كدا..
شكرا اوي وفي انتظار الدرس...

#43 babbypirate

babbypirate

    مشترك

  • الأعضــاء
  • 50 مشاركة

تاريخ المشاركة 27 January 2009 - 11:44 PM

لا انا مش عايز فرايدايز انا عايز حواوشي و حاجه ساقعه مشبره
و بالنسبه للاسئله والله انا بعمل شوية اسئله اليومين دول بس اصبر عليا شويه
لان ورايا شغل و كتابة المحاضرات و طبعا لازم اشوف نفسي شويه ف ان شاء الله قريب هحطلكم كم من الاسئله تكون في مستوى الطالب المحترف

انا تقريبا قربت اخلص الدرس القادم بس مش هحطه الا لما آكل عشان بصراحه انا جعان
و ان شاء الله بعد الدرس هيكون في شوية اسئله ع الماشي كده عشان اعرف مين اللي بيذاكر و مين اللي ما بيذاكرش

وهقولكم ازاي توروني الواجب اللي هينطلب منكم

تحياتي لكم

#44 م/طارق القرم

م/طارق القرم

    عضو

  • الأعضــاء
  • 5 مشاركة

تاريخ المشاركة 28 January 2009 - 12:02 AM

أستاذنا الجميل

بابي باشا بيريت

كدة أنا نطقته صح ؟؟

ربنا يستر

حقيقي شرحك ممتع

وأسلوبك فريد (مش الأطرش طبعاً) من نوعه

أنا متابع

أخوك بتاع شبكات من سنين وداخل الأوريكل جديد

ووقعت من السما

وانت سبتني
:unsure:

ربنا يجزاك خير

ومعلش لو ممكن تكمل وبلاش بيبسي دلوقت

==============================
الحاجة الوحيدة اللي مافهمتهاش من الدرس

يعني ايه مشبرة
:)

#45 BeCkHaM.11

BeCkHaM.11

    عضو

  • الأعضــاء
  • 16 مشاركة

تاريخ المشاركة 28 January 2009 - 05:26 AM

استااااز معلش بس انت بقااالك 3 سنييين مش وااكل ولا ايه.. فين الدرس بجد انت اتأخرت علينا اوي المرة دي؟؟؟؟؟
يلا منتظرين الدرس.... وشكرا ليك..:)